Pajdaš moj dragi !
Noć je i ti spiš, a ja sam se zmislila da ti of čas moram lista napisati i nekaj važnega povedati.
Znaš, ono najvažnejše f življenju najpogostejše pozabimo povedati, kajti se računa da se zna.
Pa ni tak.
Zato ti ja ovega lista pišem, da buš znal, da bu ostalo zanavek zapisano.
Ti danes znaš kaj znači reč pajdaš, a onda , gda nam je Bogek pute splel , nisi razmel skoro ni jenu moju domaču zagorsku reč.
Me je bilo i teško razmeti, kajti dok sam s tatekom , kaj je bil veternar, po selih hodila, sam f sakem pokupila neku drugšnu reč za istu stvar.
Lepi su to bili cajti i lepo vučenje najlepšega jezika na svetu, onega kaj po kruhu na zeljovoj perini pečenom diši, kaj f sebi čuvle fse lepote bregih, hostih, gmajnih i potokih,
onega f kojem ftiči najglasnejše žvrgoliju, sneg škriple kak da popeva, a zrak po friškem i po zelenom diši.
A kaj da ti sad pripovedam, je meni najlepši na svetu kak i tebi tvoj.
Ono kaj sam ti štela povedati je jeno velko fala kaj si nafčil i zavolel taj moj kaj.
Fala ti za fsa ta leta kaj si mi pajdaš, kajti ljudih je veliko, a pravih pajdaših je fse manjše.
Fala ti kaj razmeš mene i moj kaj i onda gda kak klopotec f trsju klepečem i onda gda čkomin.
Fala ti !
To sam ti štela povedati, a sad te najlepše pozdravlam i nek ti Bogek zdravlja da.
Hitam na poštu da ti lista pošlem.
Kušlec, tvoja Pinklec.
f Zagrebu, 4. 9.2016.
